Urtero bezala eta 19 dira, Gogorregi Konpartsak bere gunea izango du Pio Baroja plazan Bilboko Jaietako Aste Nagusiaren barruan. Aurten txosnatik aparte, egitarau potoloa prestatu dute konpartsakideek.

Egunero ekitaldiz beteriko programa antolatu dute, eta edade eta gustu guztientzat pentsatua. Gogorregik, jai herrikoiak eta parte-hartzaileak sustatzea du helburutzat. Hori dela eta goizeko 11etatik aurrera irekita egongo den txosnan honako ekitaldiak azpimarratu nahiko genituzke. Larunbatean, jaiei hasiera emango zaie goizean goizetik trikipoteoa eta ondoren txosnan izango den bazkari herrikoi batekin. Igande arratsaldez, PATXI PEREZen euskal dantzekin gozatzeko aukera egongo da.

Asteartean umeen egunean, PIRATAKLOWN ume antzerkia egongo da eta gabaz su artifizialen ondoren Nafarroatik etorritako BESTERIK GABE talde gaztea. Asteazken gauean ere, gazte talde musika bat bisitan etorriko zaigu, Balmasedatik IRAULI taldea. Ostegunean ikurriñaren egunean, omenaldia egingo zaio gure ikurrinari txosna bertan eta egun honetan eta urtero bezala gaueko 12etan ASIER BILBAOren umore showa izango dugu. Ostiralean, gure nagusien egunean betiko kantak OTXOTE ARGIA BILBO taldearen eskutik.

Tartean Gogorregi Saria 2007 banatuko da eta aurten UNAI BASURKOri emango zaio, munduari bira itsasoz egindako lorpenagatik eta gure hiri eta herriaren irudia mugaz gaindik eramateagatik. Aurtengo nobedadeen artean, txosnaren pintaketa ARTE URBANO DERIO gazte taldearen eskutik etorriko da. Bestetik eta txosnara hurbiltzen direnek, BLUETOOTH bidez, Gogorregiren jaietako egitaraua eta abestia jeitsi ahal izango dituzte era erraz batean eta musu-truk. Honetaz aparte, pantaila-haundi bat jarriko dugu, jendearen jaietako argazkiak, bideoak… proiektatu ahal izateko.

Informazio gehiago, Aste Nagusirako Gogorregik martxan jarri duen GOGORBLOG2007an (http://www.gogorregi.org) edo 695.77.18.42 telefono zenbakian.

Gogoratu aurtengo jaietan, hurrengo geltokia; GOGORREGI!

Prentsa oharra (PDF formatuan) – Nota de prensa (Formato PDF)